Зәй районында җылылык сезонын башладылар
Зәй районында 22 сентябрьдән социаль инфраструктура объектларын җылылык белән тәэмин итү башланды. Җылыту системасына беренчеләрдән булып балалар бакчалары, мәктәпләр, сырхауханәләр һәм хастаханәләр тоташтырылды, бу балалар һәм пациентлар өчен уңайлы шартлар тудырырга мөмкинлек бирде.
Торак йортларга җылылык бирү дүшәмбедән, 29 сентябрьдән башлана. Күпфатирлы йортларны тоташтыруны башлау турында карар һаваның уртача тәүлеклек температурасы биш көн дәвамында тотрыклы рәвештә +8 градустан артмаганнан соң кабул ителә.
Торак йортларда җылытуны тоташтыру процессы акрынлап барачак. Бу системаны салмак көйләү һәм мөмкин булган җитешсезлекләрне бетерү өчен кирәк. Җылылык челтәрләрендәге зыянны тиз арада бетерү өчен ремонт-торгызу бригадалары оештырылган. Районның коммуналь хезмәтләре көзге-кышкы чорда кулланучыларны ышанычлы һәм өзлексез җылылык белән тәэмин итү өчен көчәйтелгән режимда эшли.