Шәһәр бистәләрендә халык белән очрашулар тәмамланды
Бүген район мәдәният йортында Зәй-2 микрорайонында яшәүчеләрнең очрашуы булып узды. Җыелышта район башлыгы Кәримов Р.Г., шәһәр Башкарма комитеты җитәкчесе Павлова Н.Г., шәһәр башлыгы урынбасары Максимов С. В., район учреждениеләре һәм оешмалары җитәкчеләре катнашты. Район башлыгы Разиф Кәримов үзенең чыгышын агымдагы елның истәлекле вакыйгасы - Бөек Ватан сугышында Җиңүнең 80 еллыгы турында искә төшереп башлады. Ул махсус хәрби операция зонасында хәрби бурычларын үтәүче егетләребезнең батырлыгын билгеләп үтте. Ватан өчен шундый катлаулы вакытта берләшкән һәм махсус хәрби операциядә катнашучыларга кирәкле ярдәм күрсәткән халыкка рәхмәт белдерде. Аннары Разиф Гали улы агымдагы елның 1 яртыеллыгында шәһәрнең социаль-икътисадый үсеше, шулай ук ел тәмамланганчы ниләр эшләнәчәге турында сөйләде. Шәһәрне төзекләндерү эшләре турында шәһәр Башкарма комитеты җитәкчесе Павлова Н. Г. аңлатып үтте. Зәй районы буенча полиция участок уполномоченные Әхмәтяров Э. В. мошенниклыкның киң таралган ысуллары турында хәбәр итте һәм куркынычсызлык кагыйдәләре турында искәртте. Зәй-2 микрорайонындагы эшләр турында челтәр компаниясе, ветеринария берләшмәсе, газ хезмәте җитәкчеләре сөйләде. Авыл хуҗалыгы һәм азык-төлек идарәсе башлыгы Ф.Т. Камалиев кече хуҗалыкларга дәүләт ярдәме чаралары турында мәгълүмат бирде. Җыелыш башланганчы тормыш тәэмин итү хезмәтләре җитәкчеләре халыкны кабул иттеләр, борчыган сорауларга аңлатмалар бирделәр. Очрашуда катнашучыларга Татарстан Республикасы казанышлары турында видеоролик күрсәтелде. Очрашуны тәмамлап, район башлыгы Разиф Кәримов Зәй-2 микрорайонында үз ишегалларын төзекләндерүдә катнашкан һәм «Безнең ишегалды»программасын тормышка ашыруга өлеш керткән иң актив кешеләргә Рөстәм Нургали улы Миңнехановның Рәхмәт хатларын тапшырды.