Зәйдә хәрби хезмәткәр А.И. Архиповны соңгы юлга озаттылар
Бүген зәйлеләр махсус хәрби операциядә катнашканда һәлак булган рядовой Архипов Антон Иванович белән хушлаштылар. Матәм панихидасы «Энергетик» мәдәният йортында узды. Район башлыгы Р.Г. Кәримов Антон Архиповның туганнарына һәм якыннарына, барлык зәйлеләргә кайгы уртаклашу сүзләре белән мөрәҗәгать итте.
"Хезмәт бурычын үтәгәндә батырларча һәлак булган Антон Иванович Архиповны тирән кайгы һәм кире кайтарып булмаслык югалту хисе белән соңгы юлга озатабыз. Антон Иванович үз шәһәре, республикасы, гаиләсе өчен бик күпне эшли ала иде әле. Ләкин ул Ватаныбызны саклауны сайлады һәм безгә, балаларыбызга һәм оныкларыбызга тыныч күк йөзен саклап калу өчен сугыш кырында башын салды. Без аның батырлыгы алдында баш иябез. Татарстан Республикасы Рәисе, шәхсән үз исемемнән һәм барлык зәйлеләр исеменнән авыр югалту белән бәйле рәвештә кайгыгызны уртаклашам. Якын кешеңне югалтуның авырлыгын бернинди сүз белән дә аңлатып булмый. Бүген без барыбыз да сезнең белән бергә кайгырабыз. Антон Иванович зәйлеләр йөрәгендә чын ватанпәрвәрлек һәм батырлык үрнәге булып яшәр. Махсус хәрби операциядә катнашучыларның үлемсез истәлеген хөрмәтләү һәм аны буыннан — буынга тапшыру-безнең уртак бурычыбыз», - диде Разиф Галиевич.
Зәй шәһәре һәм Зәй районы хәрби комиссариатының өлкән белгеч-эксперты Георгий Борисов Россия Федерациясе Оборона министрлыгы, Татарстан Республикасы хәрби комиссариаты исеменнән һәм шәхсән үз исеменнән кайгы уртаклашуын белдерде.
Антон Архиповны соңгы юлга барлык хәрби хөрмәтләр белән озаттылар. Җыелган халык якташыбызны бер минут тынлык белән искә алды. Аны Өченче Бөгелде авылы зиратына җирләделәр. Махсус хәрби операциядә катнашучы герой истәлеге зәйлеләрнең күңелендә мәңге яшәр.