Зәйдән Туктаровлар гаиләсе-Татарстанның иң яхшы гаиләләре арасында
Гадәттәгечә Татарстан Республикасы көнен бәйрәм итү алдыннан бүген Казан Кремлендә Татарстан Республикасы Рәисе Рөстәм Нургали улы Миңнеханов һәм аның тормыш иптәше Миңнеханова Гөлсинә Әхәт кызы исеменнән Татарстан Республикасы алдында аерым казанышлары булган гаиләләрне хөрмәтләүгә багышланган тантаналы кабул итү мәҗлесе узды. Әлеге чарада Зәй муниципаль районыннан Туктаровлар: ирле-хатынлы Мөнир Хәбибулла улы һәм Илгизә Рәфис кызы катнаштылар. Мөнир Хәбибулла улы 40 елдан артык Зәй муниципаль районының Югары Пәнәче авыл җирлеге башлыгы булып эшли. Бөгелмә бухгалтерлык техникумын тәмамлагач, туган авылы Бура-Киртәгә әйләнеп кайта һәм бөтен гомерен халыкка хезмәт итүгә һәм туган ягының чәчәк атуына багышлый. Хатыны Илгизә Рәфис кызы 40 елдан артык авыл хуҗалыгы системасында баш бухгалтер булып эшләгән. Эшләү дәверендә ул үзен намуслы, җаваплы хезмәткәр, үз эшенең профессионалы итеп күрсәтә.
Нәтиҗәле хезмәтләре, район үсешенә һәм чәчәк атуына бәяләп бетергесез өлеш керткәннәре өчен, Туктаровлар Татарстан Республикасының һәм район җитәкчелегенең Рәхмәт хатлары һәм Мактау грамоталары белән бүләкләнделәр.