Зәй муниципаль районында "Татарстанда җәй" проекты актив гамәлгә ашырыла
«Татарстанда җәй» проекты кысаларында чираттагы чара 14 августта Р.Ш. Фәрдиев исемендәге паркта үтте. Бәйрәм шәһәр халкын һәм кунакларны берничә мәйданчыкта җыйды: чарада катнашучылар өчен төрле мастер-класслар оештырылды, спорт сөючеләр спорт ярышларында катнаша алды. 4 милли хуҗалык үзләренең көнкүрешен, гореф-гадәтләрен күрсәтте, милли ризыклар пешерде һәм сыйлады, Махсус оештырылган балалар мәйданчыгында балаларны уеннар, мастер-класслар белән әкият геройлары каршы алды. Барлык мәйданчыкларда да үзара хөрмәт һәм дуслык атмосферасы хөкем сөрде.
Сабир Өметбаев исемендәге Минзәлә татар дәүләт драма театры, яшь автор башкаручы Радик Шәрәфиев, «ABIEM Project» проекты, шулай ук район мәдәният идарәсенең иҗат коллективлары чыгышлары чарада катнашучыларны уңай хис-кичерешләр белән тулыландырдылар.
Чара азагында шәһәр халкы һәм кунакларына «Телсез күке» фильмын карау мөмкинлеге бирелде.