Зәйдә «Маҗаралар сукмагы» туристик походы оештырылды

2025 елның 8 августы, җомга
«Факел» яшьләр-яшүсмерләр клубы тәрбияләнүчеләре өчен «Яшьләр һәм балалар» милли проектын тормышка ашыру кысаларында Зәй-2 микрорайонының яшьләр үзәге хезмәткәрләре Зәй районының Сарсаж-Баграж авылы читендә урнашкан Кашка-Тау тавы итәгенә туристик поход оештырганнар. Бу чара балаларга табигать матурлыгыннан ләззәт алу мөмкинлеге генә биреп калмыйча, мөһим бурычларны да хәл итте: команда рухын формалаштыру, урында ориентлашу күнекмәләрен үстерү һәм физик сәламәтлекне ныгыту. Сәяхәт барышында балалар әйләнә-тирә табигатьне өйрәнделәр, командада эшләргә һәм авырлыкларны бергә җиңәргә өйрәнделәр. Катнашучылар ике төркемгә бүленеп, матур урыннар буйлап 10 чакрым юл үттеләр, үсемлекләр һәм хайваннар дөньясының күптөрлелеге белән таныштылар. "Сәяхәт-саф һавада йөрү генә түгел, бу чын тормыш мәктәбе! Без бер — беребезгә ышанырга һәм теләсә нинди очракларда ярдәм итәргә өйрәнәбез», – дип тәэсирләре белән уртаклашты сәяхәттә катнашучыларның берсе, клубның өлкән тәрбияләнүчесе Айгиз Миңнехуҗин. Остазлар куркынычсызлык техникасы буенча инструктаж үткәрделәр һәм актив уеннар оештырдылар, бу балаларның гармонияле үсешенә ярдәм итә. Барлык теоретик күнекмәләр практикада кулланылды: учак ягу; төеннәр бәйләү;урында ориентлашу; ризык әзерләү һәм башкалар. Кояшлы көн, саф һава һәм дус атмосфера бу чараны чын-чынлап истә калырлык итте. Балалар өйләренә яңа белемнәр, якты хис-кичерешләр һәм бик күп кызыклы тарихлар белән кайттылар! Шулай итеп, әлеге чара балаларның сәламәтлеген һәм физик активлыгын ныгытуга гына ярдәм итеп калмады, ә бәлки аларда патриотик аң формалаштырды, бу исә «яшьләр һәм балалар»милли проекты кысаларында эшнең мөһим өлеше булып тора.
ЯҢАЛЫКЛАРГА ЯЗЫЛУ
Сайттагы барлык материаллар лицензия буенча тәкъдим ителә:
Creative Commons Attribution 4.0 International