Зәй районында терлек азыгы әзерләү техникасы әзерлек сызыгында

Бүген Зәй муниципаль районы башлыгы Р.Г. Кәримов, «Элита» нәсел предприятиесе» АҖ генераль директоры Ф.Р. Зарипов, Татарстан Республикасы Авыл хуҗалыгы һәм азык-төлек министрлыгының терлекчелек тармакларын үстерү бүлегенең киңәшчесе А.Г. Мөхәммәтгалиев, район авыл хуҗалыгы һәм азык-төлек идарәсе башлыгы һәм белгечләре, «Агрокөч» АҖ белгечләре, Гостехнадзор инспекциясе башлыгы составындагы комиссия азык әзерләү техникасының әзерлеген тикшерде. Тулы җыелмалы техника (сугу, ваклап-төяү, техника ярдәмендә кайтару һәм трамбовка) өч мәйданчыкта тәкъдим ителде: «Зәй» агрофирмасы – Кадер авылында, «Восток» агрофирмасы - Иске Зәйдә, «Зәй шикәре» агрофирмасы - Чыбыклы авылында. Өч отряд та югары дәрәҗәдә әзерләнгән. Механизаторлар барлык агрегатларны да янгын сүндерү җайланмалары, беренче медицина ярдәме күрсәтү өчен аптечкалар белән комплектлаган; теге яисә бу техника төрендә эшләргә рөхсәт бирә торган документлары бар. Быел район игенчеләре 8300 гектардан азык культураларын җыярга тиеш булалар, шулардан 5200 гектары - люцерна, 1933 гектары -силос өчен кукуруз һәм 1000 гектардан артык – беръеллык үләннәр. Механизаторлар хезмәт хакы турында, шулай ук матди кызыксындыру чаралары белән таныштылар. Район башлыгы терлек азыгы җыюда нәтиҗәле эшләр теләде. «Механизаторларыбыз беркайчан да сынатмадылар һәм быел да куелган бурычларны лаеклы үтиләр. Хәерле юлга!», -диде Разиф Гали улы.