Елга янындагы территорияне җыештыру

Табигать кочагында йөргәндә күңелсез күренешкә тап булабыз: урманда, бигрәк тә елга һәм күл ярларында чипсылардан калган каплар, буш шешәләр, пакетлар ауный. Еш кына бу чүпләр еллар буена табигатьне пычратып ята. Бу ситуациядән чыгуның бер генә юлы бар — җиң сызганып, барысын да үз көчебез белән җыеп алу. Сарсаз-Баграж төп гомуми белем бирү мәктәбе укучылары экологик агарту һәм табигатьне саклау чаралары үткәрү максатыннан, үзләренең әти-әниләре белән бергәләп, елга янындагы территорияне җыештыруда катнаштылар. Алар елга янындагы чүп-чарны, коры ботакларны җыеп, капчыкларга тутырып, чүплеккә озаттылар. Бу эш аларны яшәү тирәлегенә җаваплы карарга өйрәтә, укучыларда экологик культура тәрбияли. Шулай ук алар туган җирнең гаҗәеп матурлыгын сакларга да өйрәнәләр.