Зәйнең "җырлаучы фонтаннары" үз эшен башлады

Бүген Р.Ш. Фәрдиев исемендәге паркның икенче чиратында һәм «Энергетик» мәдәният йорты каршындагы мәйданда фонтаннар сезонын ачуга багышланган тантаналы чаралар узды. Үзәк мәйданда чара «Легенда» хореография коллективы һәм Әлмәт шәһәренең «ABIEM Project» вокаль төркеме чыгышлары белән үрелеп барды. Фәрдиев исемендәге паркта сәламләү сүзе белән шәһәр Башкарма комитеты җитәкчесе Наталья Павлова чыгыш ясады, ул зәйлеләрне әлеге мөһим вакыйга һәм булачак бәйрәмнәр белән котлады, барысына да сәламәтлек, тормыштагы якты мизгелләрнең күбрәк булуын, иминлек һәм аяз күк йөзе теләде. Үзенең дәртле биюе белән кунакларга бәйрәм кәефен «Каприз» хореография коллективы бүләк итте. Һәр фонтанның репертуарында 20 композиция, татар телендәге җырлар русча композицияләр белән чиратлаша. Мәйданда һәм паркта музыка көн саен 10:00 сәгатьтән 22:00 сәгатькә кадәр яңгыраячак. "Җырлаучы фонтаннар" 31 августка кадәр эшләячәк.