Зәйдә Эвелина Сәетгәрәева “Автоледи-2018” титулына ия булды

Район “Автоледи-2018” бәгесе бүген Зәй политехник көллияте мәйданчыгында узды. Машина йөртү осталыгында һәм юл хәрәкәте кагыйдәләре буенча белемнәре буенча сынашырга 10 гүзәл зат теләк белдерде. Бәйгедә катнашучыларны район башкарма комитеты җитәкчесе Илнар Хафизов, ЮХИДИ башлыгы Рамил Гарифуллин сәламләп, уңышлы чыгыш ясауларын теләделәр. 1нче этапта хатын- кызлар машина йөртү буенча 5 элементны үтәделәр, икенче этапта юл йөрү кагыйдәләре буенча имтихан тапшырдылар. Гомуми нәтиҗәләр буенча “Автоледи-2018” исеменә Эвелина Сәетгәрәева лаек дип табылды. Ике ел йөртү стажына ия кыз 12нче август көнне башкалабыз Казанда бәйгенең республика этабында Зәй данын яклаячак. Икенче урынга 4 ел машина йөртү стажы булган Анна Муханова, өченче урынга 7 ел машина йөртүче Светлана Кудряшова чыкты. Җиңүчеләргә истәлекле бүләкләр һәм дипломнар тапшырылды.