«Зәй» агрофирмасы игенчеләре районда беренчеләрдән булып көзге бодай суктыруны тәмамладылар

“Зәй” агрофирмасы игенчеләре районда беренчеләрдән булып көзге бодай суктыруны тәмамладылар. Быел ул 2878 гектар мәйданда игелде, барлыгы 13354 тонна ашлык суктырып алдылар, уртача уңыш гектарыннан 46,4 центнер тәшкил итте. Агрофирма басуларында 5әр комбайннан торган ике отряд эшләде. Барысын да тәҗрибәле механизаторлар иярли. Андрей Митрофанов “Тукано -450” комбайнында 1463 тонна икмәк суктырды. Рамил Сибгатуллин – 1206 тонна, Айрат Сафин -1155 тонна, Дмитрий Исаичев -1079 тонна көзге бодай суктырды. Югары оешканлык һәм үзара ярдәмләшеп эшләү нәтиҗәсендә көзге бодайны кыска срокларда һәм югалтуларсыз җыеп алдылар. Иң югары уңыш “Алга” бүлекчәсендә - гектарыннан 58,8 центнер. Көзге культураларны суктыру “Зәй шикәре” агрофирмасының “Заман” бүлекчәсендә дә тәмамлану алдында тора.